Andecha Astur presentase na coalición UNIDÁ xunto con IAS y Los Verdes-Grupu Verde

La coalición presentaráse baxo’l nome d’UNIDÁ y propondrá una alternativa rial y illusionante en clave nacionalista asturiana, d’izquierdes y ecoloxista a les actuales polítiques de PSOE-IU y PP.
Andecha Astur, Izquierda Asturiana (IAS) y Los Verdes-Grupu Verde pesllaron esta fin de selmana un alcuerdu pa concurrir de forma conxunta a les elleiciones autonómiques de mayu. Depués de selmanes de negociación, el Secretariu Xeneral d’Izquierda Asturiana (IAS), Faustino Zapico, el Secretariu d’Organización d’Andecha Astur, Germán Abad, y la representante de Los Verdes-Grupo Verde, Rosana Rodríguez, pesllaron l’alcuerdu elleutoral pol que les tres formaciones presentarán llistes conxuntes nes tres circunscripciones elleutorales asturianes.
IAS, Andecha Astur y Los Verdes alcordaron que’l nome de la coallición seya UNIDÁ seguíu del nome de los tres partíos. Según los representantes de les tres fuercies, l’oxetivu del alcuerdu ye ufiertar a la sociedá asturiana un proyeutu alternativu a les polítiques depredaores col mediu ambiente y la identidá asturiana que PSOE y PP tienen aplicao nos sucesivos gobiernos de los últimos años, y que suponga al tiempu una alternativa rial al supuestu asturianismu y al seudoecoloxismu impostáu d’IU que, cuando toca gobernar, amuesa que nun ye más qu’una muleta del PSOE. De fechu, en Los Verdes-Grupo Verde intégrense varios ex-militantes de Los Verdes d’Asturies disconformes col pautu d’esti partíu con IU, amás d’otros miembros d’estremaos coleutivos vecinales y ecoloxistes, a títulu personal.
Les tres formaciones trabayen estos díes pa rematar les exes de la so propuesta elleutoral que, según señalaron “daránse a conocer, xunto colos candidatos, en tan solo unos díes”, pesia qu’adelantaron que nos mesmos tendrá gran importancia la defensa del drechu d’Asturies a decidir el so futuru y les alternatives a les polítiques que conderguen a la nuestra mocedá a la emigración, y tamién la defensa de la cultura asturiana y d’un modelu social, económicu y ecolóxicu basáu na xusticia social y nes polítiques sostenibles, que pare la desapaición del nuestru patrimoniu natural y cultural.
Andecha Astur
0 comentarios