Día de la muyer trabayadora / muyer cuidadora
El 8 de Marzu, como tolos años, cellébrase’l Día la muyer trabayadora. Tol mundu entama a falar de la doble xornada (trabayu fuera y trabayu dientru casa), pero naide fala del pasáu, de les nueses madres que nun trabayaben fuera de casa, pero teníen trabayu abondo dientro. Cargaes de fíos a los que dar de comer, con montonaos de ropa que llavar a mano n’aquellos llavaderos onde l’agua taba xelao. Amás de facelo ensin rechistar — “yera la so obligación”. Elles, les nueses madres, tamién teníen que cuidar a los güelos, atendelos, face-yos compañía… y too dende’l respetu que se-yos tenía a les presones mayores. La xente puede camentar qu’eso nun yera trabayu… nun taba remunerao.
Güei, les muyeres trabayamos fuera de casa: hai que pagar los recibos de lluz, agua, les hipoteques, y hai que comer. Too esto fai que nun quede tiempu pa cuidar a los fíos, hai que mandalos al colexu; asina que los mimos y los chuchos queden pal fin de selmana, si ye que podemos dedica-yos un ratín.
Llueu tan los vieyos, ya naide tien tiempu p’ atendelos, asina que van pa lo qu’ enantes se nomaba los “asilos”. Ellí escaecemos qu’ esisten.
Pero tamién hai otros “afortunaos” que tán na so casa atendíos por “otres muyeres”, les ilegales, les que vienen de Sudamérica o d’Europa del Este. Vienen a ganar un sueldu pelín xustu poles circustancies nes qu’entren nel Estáu Español, amedranaes de que les pille “la pasma”. Eses muyeres tienen que tar años ensin ver a los sos neños por mieu a que, si salen del país, nun les dexen volver a entrar.
Y, ¿qué ye lo que fai’l gobiernu español? Peslla los güeyos, peslla la frontera y dexa qu’ eses muyeres entren sin papeles, magar que tán faciendo un gran llabor, tán faciendo que delles persones puedan tener una bona vida no cabero los sos años. Daqué que tienen bien merecido dempués de tol trabayu desendolcáu fasta la xubilación.
Camiento si la llei de dependencia que, según el PSOE va ser “la panacea”, nun debería recoyer la posibilidá del contratu llegal a persones d’otros países pa facer de cuidadores, p’ atender a les persones mayores o a los discapacitaos. Asina ganaríamos toos:
- Les inmigrantes entraríen llegalmente con un contratu de trabayu.
- Los nuesos pas taríen bien cuidaos y atendíos nel so llar.
- L’Estáus aforraría perres abondo en gastos d’hospital o de residencies.
Con esti articulín quiero facer un merecíu homenaxe a les nueses mas que trabayaron como burres pa danos lo meyor: “una educación que mos sacara de la probitú”. Pero tamién quiero agradecer a les milenta muyeres que vienen ensin papeles a trabayar n’Asturies, qu’elles tamién vienen pa sacar a la so familia de la probitú.
Al fin y al cabu nun somos tan diferentes. Ye más: paezme que somos iguales.
0 comentarios