Blogia
andecha astur tinéu

Sobre Andecha Astur

Andecha Astur ye una organización nacionalista asturiana y d’izquierdes que defende’l drechu d’autodetermín de los asturianos al considerar Asturies como una nación, por tener hestoria, llingua y tradiciones propies. Andecha Astur ye un movimientu alternativu, ecoloxista y plural, basáu nel furrulamientu asambleariu y na democracia de base, y poro, nel protagonismu de los sos militantes.

Andecha Astur furrula al traviés de los conceyos y del órganu que los representa, la Xunta Nacional, qu’aconceya una vegada al mes. D’otra banda, la Xunta Executiva ye la que lleva a la práutica’l día a día y los determinos de la Xunta Nacional.

El Conceyu Nacional ye l‘órganu cimeru d’Andecha Astur, y en condiciones normales aconceya cada tres o cuatro años. Nelli escuéyese una Xunta Executiva ca vegada.
La Xunta Executiva actual d’Andecha fue escoyía el día 27 de mayu de 2006 col sofitu del 90% de los votos del Conceyu Nacional, cellebráu en Candás. A ella pertenecen Olaya García Rubiera como Secretaria Xeneral, Germán Abad como Secretariu d’Organización y Roberto Holgado como Coordinaor de la Xunta Nacional.

Andecha tien agora dos conceyales: Violeta Santapaz, nel Conceyu de Riosa, y Santiago Artime, nel de Carreño.

Andecha Astur atalanta que la situación d’Asturies ye pergrave nel planu social, económicu y político-xurídicu. Nun hai más que ver los indicadores socieconómicos, la tasa elevadísima de emigración, na mocedá sobre too, el procesu de desindustrialización que sufrimos, y la destrucción y precariedá del emplegu pa decatase de que vamos direutos a una situación desastrosa. Por ello, n’Andecha Astur atalantamos que ye urxente la xunidá de toes les fuercies polítiques y sociales del nacionalismu d’izquierdes n’Asturies, respetando les diferencies, pa entamar el procesu de recuperación de les nuestres señes d’identidá y la recostrucción social y económica.

0 comentarios